Press Releases

For immediate release: Reykjavik, July 28th 2020

Móðurfélag Loðnuvinnslunnar hf., Kaupfélag Fáskrúðsfirðinga, hefur fjárfest í Responsible Foods ehf. Ný vinnsla á einstöku nasli úr sjávarfangi sett upp á Fáskrúðsfirði.

Loðnuvinnslan Ltd invests in Responsible Foods to set up innovative seafood snack food production on the East Coast of Iceland

Móðurfélag Loðnuvinnslunnar hf., Kaupfélag Fáskrúðsfirðinga hefur fjárfest í nýsköpunarfyrirtækinu Responsible Foods ehf. og er nú unnið að undirbúningi á uppsetningu á vinnslu á Fáskrúðsfirði sem mun vinna nasl úr sjávarfangi. Þetta er umbyltandi vinnsla sem tengir íslenskan sjávarútveg við vaxandi eftirspurn í heiminum eftir hollustu nasli. Responsible Foods rekur nú þegar vinnslu í Húsi Sjávarklasans í Reykjavík og framleiðir þar nasl úr íslenskum hráefnum. Með nýrri vinnslu á Fáskrúðsfirði tvöfaldast afkastageta félagsins.

Spakur Finance leiddi þessa fjárfestingu. Kaupfélag Fáskrúðsfirðinga bætist þannig við öflugan hóp fyrirtækja og einstaklinga sem hafa fjárfest í Responsible Foods, hér má nefna Mjólkursamsöluna og Lýsi hf.

Kaupfélag Fáskrúðsfirðinga og Responsible Foods sjá mikla framtíð í að auka til muna verðmæti íslensks sjávarfangs og bjóða heimsbyggðinni upp á nýjar einstakar naslvörur unnar úr framúrskarandi hráefnum Loðnuvinnslunnar. Félögin sjá mikil tækifæri í að setja upp vinnslu sem sérhæfir sig í nasli úr sjávarfangi á Fáskrúðsfirði, þar sem aðgengi að fyrsta flokks hráefni og þekkingu er til staðar. Við framleiðsluna á Fáskrúðsfirði munu skapast allt að 10 fjölbreytt störf á næstu árum, samfélaginu þar til hagsbóta.

Responsible Foods var stofnað árið 2019 af Dr. Holly T. Kristinsson með það að markmiði að umbylta naslmarkaðnum með nýju heilsunasli sem fyrirtækið hefur þróað undir vörumerkinu NæraTM. Fyrirtækið notar brautryðjandi tækni sem gerir það mögulegt að vinna og þurrka matvæli og önnur hráefni hraðar og við lægra hitastig en áður hefur verið hægt. Með þessari tækni er hægt að framleiða vörur sem eru með mjög hátt næringargildi og langt geymsluþol við stofuhita. Allar vörur fyrirtækisins byggja á íslensku hráefni. Með tækninni er hægt að vinna og þurrka sjávarfang á alveg nýjan máta sem engin önnur tækni getur leikið eftir. Hægt er að framleiða fiskinasl sem hefur enga fiskilykt en frammúrskarandi bragðgæði og opnar á alveg ný tækifæri fyrir þurrkaðar vörur úr íslensku sjávarfangi á erlendum mörkuðum.

Loðnuvinnslan er rótgróið sjávarútvegsfyrirtæki í fremstu röð og fer öll starfsemi fyrirtækisins fram á Fáskrúðsfirði. Hjá fyrirtækinu starfa um 150 starfsmenn.

Naslvörur Responsible Foods eru einstakar á heimsvísu. Þær eru með hátt innihald próteins og annarra næringarefna, eru með einstaka áferð og eru unnin úr íslenskum hráefnum af hæstu gæðum. Gríðarlegur árlegur vöxtur er á markaði fyrir nasl sem telst “lítið unnið” og munu vörur fyrirtækisins fara inn á þann markað sem hollari valkostur og mæta aukinni eftirspurn neytenda eftir hollum og bragðgóðum vörum unnum úr hágæða hráefnum. Fyrirtækið mun setja sínar fyrstu vörur á markað á Íslandi í lok sumars á þessu ári. Meginþorri framleiðslunnar mun fara á erlendan markað, sér í lagi á Bandaríkjamarkað en Holly hefur umfangsmikla þekkingu og reynslu á Bandaríkjamarkaði þar sem hún vann áður fyrir stór matvæla- og innihaldsefnafyrirtæki.

Holly, sem ólst upp í Alaska, féll fyrir íslensku hráefni og mat þegar hún flutti til Íslands 2015. Hún sér einstök tækifæri á að koma íslenskum afurðum á markað erlendis í öðru formi en áður hefur verið gert. Eitt af meginmarkmiðum Responsible Foods er að hagnýta íslenskt hugvit íslensku samfélagi og efnahagi til góða. Fyrirtækið áætlar að ráða á þriðja tug starfsmanna í fjölbreytt störf á næstu árum, en um helmingur þeirra verður á Fáskrúðsfirði. Fyrirtækið leggur áherslu á að auka útflutningsverðmæti meðal annars íslensks fisks og mjólkurvara með tækni sinni og mætir vaxandi eftirspurn eftir íslenskum afurðum á erlendum mörkuðum.

Tengiliðir:

Dr. Holly T. Kristinsson

Framkvæmdastjóri

Responsible Foods ehf

s. 858 5060

Fáskrúðsfjörður á fallegum degi. Responsible Foods mun setja upp vinnsluna sína við sjávarsíðuna. Mynd: Óðinn Magnason.